The US Open

US Open, tennis infiamnaa Grand Slam an tih pali zinga kum khata an khelh hnuhnun ber thin, hard-court Grand Slam awmchhun chanchin hi i’n bih chiang teh ang.

A tirin

Kum 1881 August thla khan US National Championships chu Newport Casino, Rhode Island-ah an khel tan a. Hei hi tuna US Open lo chhuah tanna a ni a, mahse, US Open khelh tan hunah an chhiar chuang lo. Wimbledon tih lohva Grand Slam upa ber a ni a. A tirah chuan mipa singles leh mipa doubles chauh an khel a. Kum 1877 khan hmeichhe singles an telh a, a hnu kum hnihah hmeichhe doubles pawh an telh leh.

Grass, Clay leh Hard court

US Open hi Grand Slam zingah grass court, clay court leh hard court-a khelh vek tawh awmchhun a ni a. Kum 1974 thleng khan grass court-ah khelh a ni a. 1975 atanga 1977, kum thum chhung kha clay court-a khelh thin a ni leh a. 1978 atangin tuna an khelhna hard court-ah hian khelh a ni leh ta a. 1914 thleng khan Newport Casino-a grass court-ah an khel thin a, 1915 khan West Side Tennis Club, Forest Hills, New York-ah insawmin, 1977 thleng hetah hian an khel a. Hetah hian vawi 60 lai tournament an nei hman a, a hnuah tuna khelhna hmun, USTA National Tennis Center, Flushing Meadows-ah hian khelh a ni leh ta a ni.

Tuna khelhna

Kum 2006 khan tuna an khelhna hmun hi US tennis star ropui Billie Jean King chawimawi nan USTA Billie Jean King National Tennis Center tiin a hming an thlâk a. Hetah hian hard court-a khelh theihna tennis court 22 a awm a, chu bakah chuan main stadium, Arthur Ashe Stadium a awm bawk a. He stadium hi mi 23,771 zet thut theihna a ni a, tennis stadium-ah chuan khawvela lian ber a ni a. A chung khuha hawn theih (retractable) a ni nghe nghe a. Hemi bakah hian stadium tenau zawk pakhat awm lehin, chu chu Louis Armstrong Stadium a ni a. He stadium-ah hian entu mi 14,000 an awm thei a. Hei aia tê deuh stadium awm lehin, chu chu Grandstand an ti thung a, entu mipui 8,125 an leng.

Hmahruaitu

US Open hi Grand Slam tournament zinga tie-breaker hmang hmasa ber niin, 1970 khan an ching tan a. Tunah hian Grand Slam zawng zawngah hmeichhe tan third set-ah leh mipa tan fifth set-ah tie-breaker hi a chak zawk zawn nan an hmang vek tawh a ni.

1973 khan US Open-ah hian mipa leh hmeichhe champion-te hlawh zat chu a inangin an pe tan a. 1975 khan stadium leh a chhehvêlah flood-light an dah a, zanah an inkhel tan a. Hmahruaitu an ni chho  zel a ni.

Kumin lawmman

Kuminah hian nikum aiin lawmman pawisa fai hi zaa 5 deuhthawin a hniam zawk a. Kumina prize money zawng zawng hi dollar maktaduai 53.4 a ni a. Mipa leh hmeichhe singles champion te chuan dollar maktaduai 3 an hlawh dawn a, nikum aiin dollar nuai 9 zetin an hlawh hi a tlem zawk dawn. Chutih lai chuan first round-a chak lote chuan dollar 61,000 an hlawh dawn a, nikum aiin an hlawh tam zawk dawn a ni.

Trophy

US Open trophy-te hi Tiffany & Co. siam a ni.

Mi hmingtha te

Roger Federer, Jimmy Connors leh Pete Sampras te chu US Open-ah vawi nga theuh champion tawh an ni a. Hmeichhe lamah Chris Evert leh Serena Williams-te chu vawi ruk theuh an champion tawh bawk.

Mipa singles-ah hian Rafael Nadal chu champion lai a ni a, hmeichhe lamah Bianca Andreescu chu champion lai niin, an pahnih hian kuminah an khel dawn lo ve ve thung a ni. Kuminah hian mixed-doubles an khel lo.

Record thenkhat

Pete Sampras chuan 1990 khan kum 19 leh thla khat mi ni-a champion-in, mipa lamah champion thei naupang ber record a siam a. Hmeichhe lama champion naupang ber chu Tracy Austin a ni thung a. 1979 khan kum 16 leh thla riat mi chauh niin a champion.

Champion upa lam ve thung chu - kum 1911 khan William Larned chu kum 38 leh thla riata upa niin a champion a, mipa lama champion thei upa ber a ni a. Hmeichhe lama champion thei upa ber chu 1926-a champion Molla Mallory niin, kum 42 leh thla ngaa upa a nihin a champion.

US Open final chanchina chak chiang ber chu Jimmy Connors niin, kum 1972 khan tum hnih champion tawh Ken Rosewall chu 6-1, 6-0, 6-1  in a sawp a ni.

US Open chanchina match khat khelh rei ber chu 1992 kum khan thlengin, Stefan Edberg leh Michael Chang te an inkhel a. Darkar nga leh minute sawmhnih leh paruk an inkhel a. A tawpah Sweden mi Edberg hi 6-7 (3-5), 7-5, 7-6 (7-3), 5-7, 6-4 in a chak hram a. Hmeichhe lama inkhel rei record chu 2017 kuma Shelby Rogers leh Daria Gavrilova te inkhel kha niin, darkar thum leh minute sawmthum leh pathum an inkhel a, a tawpah Rogers hi 7-6 (8-6), 4-6, 7-6, (7-5) in a chak a ni.

Goran Ivanisevic leh Daniel Nestor-te chuan kum 1993 khan first round-ah US Open chanchina tie-break rei ber an khel a. Point 38 lai an inlâk chhawk chhoh hnuah Croatia mi Ivanisevic hi 6–4, 7–6(7–5), 7–6 (20–18) in a chak hram a ni.

Kum 2001 khan Williams sisters an tih - Venus leh Serena Williams-te chu US Open final-ah hian an intum a, anni hi US Open final-a unau intum hmasa ber an ni a, hemi tum hian Venus hi a chak zawk a ni.

Connors hi grass, clay leh hard court-a US Open champion awmchhun a ni.