Thiago Alcantara

Ram pathum tan khel thei a ni a, mahse, Spain ram tana khelh a thlang a. Brazil mi a ni a, Italy-ah piangin, Spain ramah a hun tam zawk a hmang bawk a. Premier League champion lai Liverpool-in Bayern Munich a\anga an lak luh Thiago Alcantara hi tunlai football khawvela mimal chanchin sawi hnem ber a ni hial awm e. I han sawi ve dawn teh ang.

Nau awih thiam mi pathum

Thiago Alcantara chanchin bul thut hre tur chuan kum 1994 World Cup, USA kha va sawi thlen a ngai! Kha World Cup-ah khan Brazil an champion a, an match zawng zawngah Iomas do Nascimento,  ‘Mazinho’ ti-a hriat zawk chu a khel kim vek a. Mahse, field chhunga a chet danah mi mit fukna a ni em em lo va, hriat reng tur thil a ti mang lo. 

Quarter-final a ni a, Brazil leh Netherlands an inkhel a. Brazil striker Bebeto chuan  Brazil tan chakna goal a khung a, field sir lam panin a tlan a, Mazinho leh Romario-te chuan an va ûm pha a, an pathumin nau awi ang takin an ti kual ta vel a. Chu chu Bebeto-a fapa piang hlim an lawmna a ni. He goal celebration hi kum tam tak chhung sawi hlawh a tling a. Bebeto leh Romario te hi chu khatih lai khan khawvela player langsar an ni a; Mazinho erawh tuman an sawi lo. Khatia Brazil player pathumin nau awi ni awm taka Bebeto goal khung an lawm (celebrate) tuma Bebeto leh Romario ni lo, pakhat lo tel ve kha Mazinho a ni a, kha pa kha Thiago Alcantara pa (father) a ni!

Ram hrang hrangah

Thiago hi khawvel hmun hrang hranga kal kual hnem pawl tak a ni ang. A pa inkhelh vangin an kual nasa ve hle a. San Pietro Vernotico, Italy-ah a piang a. Rio de Janeiro-a  Flamengo Academy-ah football a khel tan a, Spain ramah  a kal leh a, Rio-ah bawk a kir leh a. Kum 14 mi a nih kum 2005 khan Barcelona-ah kal lehin Barcelona football academy-ah a lut a ni.

A pa Brazil mi a nih avangin a duh chuan Brazil ram tana khel thei a ni a. Italy rama piang a nih avangin Italy ram tana khel thei a ni bawk a. A naupan lai atanga Spain rama football khela awm a nih avangin leh ram dang tana a khelh loh avangin Spain ram tan pawh a khel thei bawk a. Under-16 level-ah Spain ram tan a khel a. A pa chuan Brazil ram tana khel turin a duh a, mahse, Thiago hian Spain ram tana khelh tlang law law a thlang ta a. “Spain-ah hian ka chengin ka thanglian a, chuvangin Spain ram tan ka khel a ni,” tiin a sawi thin.

Spain ram tan hian international macth 35 chuang a khel tawh.

A ropui ber!

Mario Baloteli i hria em? Italian striker talent nei tha, a nungchang a that loh avanga a that anga khel chhuak zo lova sawi thin a ni. Kum 2006 khan Thoago-te nen hian Barcelona-a lut turin an trial a. Thiago hi chu lak a ni a, Balotelli hi lak a ni ta lo. Mahse, Balotelli hian Thiago hi thiam a ti a, a theihnghilh lo. Thiago hian Spain ram tana a khelhna hmasa berah Italy an tum a, Spain hi 1-2 in an chak lo. Spanish media-te chuan Spain ram tana a vawi khat khelhna khel zo hlim Thiago chu an kawm a, chutih lai chuan Balotelli hi rawn kalin, camera hmaah chuan Thiago hi rawn kuahin, “el mas grande” (The greatest - ropui ber) a rawn ti a “He pa hi a ropui ber,” a tihna a ni.

La Masia chhuak

Khawvela midfielder tha an sawi apianga an hming dai tawh lo tur Andres Iniesta leh  Xavi Hernandez-te chawr chhuahna, Barcelona academy - La Masia-a inzir chhuak Thiago hi Pep Guardiola’n Barcelona manager hlawhtling tak ni tura bul a tan lai vel khan Barcelona tan Thiago hian a khel ve tan a. Mahse, a langsar lo, hemi hnu kum thum velah hian Barcelona player a rawn ni ve tak tak chiah. Kum 2012/13 season khan Barca tan a khel pha tak tak chho va, a hming a chher tan chiah tihin Catalan-ho mak tih zawng takin Bayern Munich a zawm ta daih a. A chhan pawh thil dang a ni lo, Bayern hi a pu em em Josep Guardiola chuan a enkawl dawn vang a ni. 

Barcelona chhuahsan mah se academy lama a khelhpui thin Sergio Busquets, Jordi Alba leh Marc Bartra-te chu a thian tha ber ber an la ni ta zel a. Batra phei hi chu Borussia Dortmund-ah a khel ve nghe nghe a ni.

Unau nauvin

Barcelona-a a khelhpui thin dang pakhat chu Rafinha a ni a, ani hi chu tun thlengin a la khel. Rafinha hi Thiago unaupa a ni. Midfielder ve tho a ni a, Thiago ang lo takin ani hi chuan Brazil ram tana khelh a thlang zawk a. World Cup khel se, an unau hian an intum thei tihna a ni a, An nu Valeria chuan tan zawk tur a hre lo maithei!

Bayern tana lansarhna

Thoago hi midfielder langsar lem lo, team tana tangkai tak si a ni a. Kum 2013 Club World Cup-ah khan Morocco club Rabat Casablanca nen final an khel a, khatah khan Bayern chu 2-0 in an chak a, an goal hnihna  chu Thiago khung a ni a; khata tang khan Bayern fan-te pawhin an ngaina tak tak tan niin sawi a ni a. Pep Guardiola’n Bayern tana trophy a lak pahnhna a ni. Hemi hma hian European Super Cup -ah Chelsea an lo hneh tawh.

Guardiola hian Bayern a zawm tirh khan player lak luh tur a duh an zawt a. “Thiago ka duh. Thiago kan la lut lo a nih chuan tumah dang lak luh a ngai lo,” a ti hmiah mai an ti!  A la lut ta rêng bawk a.

Guardiola awm lo pawhin

Kum 2016-ah Guardiola chuan Manchester City panin Bayern Munich a chhuahsan a, a duh taka a lak luh Thiago pawh Bayern-ah a hnutchhiah Carlo Ancelotti hnuaiah, kum 2016/17 season khan Thiago chuan kum khat chhungin minute 2,291 a khel a, goal ruk khungin assit vawi nga a nei bawk. Guardiola chhuak mah se Thiago thluaka thiamnaa tuh chu a nung zel a ni.

Bayern boss (hlui ni ta) Niko Kovac khan, “Sawi tur dang a awm lo, Thiago hi chu coach-te duhthusam player a ni tawp mai. Midfielder tha kan ngah a, mahse, ani hi chu kan field lai lungphu a ni. Ball nen hian engkim a ti thei a ni,” a ti.

A sawi dik em?

Kovac hian a sawi dik em le? Thiago hi ball khalh thiam, mi bum thiam a ni chiang. Chu chu a lansarhna a ni. Mahse, striker-te goal khung tur siamsak lamah pawh a tha. Ball a pass sual mawh em em a, Bundesliga-a season ruk a  awm chhung khan season tin a pass za zela 90 chu a pass dik char char a ni!

No-look pass a chin avang te, hla taka an lam pawl player ball a va pek dik chat chat thin te avangin Thiago hian fak a hlawh a. Ball pet dik em em mai hian kum 2016 December thla khan RB Leipzig nen an inkhelh tumin ho takin field sir lamah ball a pet ve ringawt a, chutih lai tak chuan electronic advertising board-ah chuan Santa Claus lem a lo lang chiah bawk a, a hnuah sawi zui a hlawh phah hle a ni.

Alcantara Foundation

A naupa Rafinha, an nu leh pa leh a nupui Julia-te nen Thiago-te chhungkua hian ‘Alcantara Family Foundation’ an din a. Football-a an larna leh hmingthatna hmang leh an sum leh pai neihte hmangin Brazil, Germany leh Spain rama naupang chanhaite tanpuina lamah nasa takin hma an la a ni.

The Alcantara Family Foundation website-ah chuan Thiago hian, “Infiamna hlutna leh ropuina hi mihring nun peng hrang hrangah hian kawng tam takin a lanchhuah tir theih a ni,” tiin a ziak.

Thiago chuan England-ah football bung thar a kai tan mek a. A chanchin kan ziak zel maithei a ni.