Kiren Rijiju

-
India ram thalaite leh infiamna lam enkawltu ministry-a a thu ber, minister thar Kiren Rijiju hi Arunchal Pradesh mi a ni a, NDA sorkar term hmasaah khan Minister of State niin, Home Ministry-ah Home Minister a pui a nih kha. Narendra Modi kaihhruai sorkar term hnihnaah a hma aia tlema chang sang leh hretin, MoS for Ministry of Youth Affairs and Sports (Independent Charge) a ni ta a ni.
Rijiju hian term hmasaa Sports Youth Affairs and Sports Minister, kum 2004 Athens Olympics-a medal latu Rajyavardhan Singh Rathore a thlak a ni.
Rijiju hi India hmarchhak a BJP hmel lantirtu mawi bera ngaih a ni mek a. Lok Sabha inthlan neih zawh takah khan Arunachal West Lok Sabha constituency atangin MP atan thlan nawn a ni a. Sports Minister ni lai Rathore pawh Jaipur Rural atanga thlan nawn leh ni mah se, Modi sorkar vawi hnihnaah chanvo a nei ve ta lo a ni.
Rijiju hian Delhi University atangin Law subject-ah degree a nei a. Sports minister a ni naa, infiamna lamah hnuhma a nei tlem ve the the khawp mai! College a kal laiin an state aiawhin National Games-ah a tel ve an ti a, mahse, chuti tak chuan an sawi ri lian ngam lo. Mahse, kum 2009 khan Eastern Panorama (chanchinbu) chuan school leh college a kal laiin ‘best athlete’ lawmman te pawh a la tawh niin an ziak!
Kum 2015 khan chhiat rupna thleng thei laka invenna kawngah nasa taka hma a lak avangin UNO chuan Disaster Risk Champion for the Asia-Pacific Region atan an puang a. Hetiang chawimawina dawng thei hi India ram zauhah hian ani chiah hian la awm.
Rijiju hi kum 1971 November ni 19 khan Nafra, West Kameng district, Arunachal Pradesh-ah Rinchin Kharu leh Chirai Rijiju-te nupa inkarah a piang a. A pa hi Arunachal Pradesh state thara assembly hmasa berah Pro-tem speaker a ni ngat.
Hansraj College, New Delhi atangin a graduate a, chumi hnuah Campus Law Centre, Faculty of Law, University of New Delhi-ah a zir chhuak leh a ni.
Kum 2004 khan tuna a nupui Joram Rina (tunah Rina Rijiju ni ta) nen an innei a. A nupui pawh hi Lady Shri Ram College for Women, New Delhi graduate niin, Arunachal University atangin Post Graduate a zo leh a, gold medalist a ni. Tunah hian Dera Natung Government College, Itanagar-ah history sibject a zirtir thin. Rijiju-te nupa hian fanu pahnih leh fapa pakhat an nei a ni.
Rijiju hi a naupan lai atanga khawtlang tana inhman nuam ti a ni a. Kum 1987 khan USSR-a Festival of India neihah pawh youth & cultural team hminga lo han kal ve tawh a ni a. MP a nih hnuah Middle East, Europe leh USA te a kal leh a, ram a fang zau tawh hle. Badminton leh Cricket khelh nuam a ti hle.
Rijiju hian politics a khelh tan chuan Congress a zawm a. BJP a sawi chhe nasa hle thin a. BJP-in Hindutva ideology an kalpui chu hmarchhak mite tan thil hlauhawm, ngaihthah chi loh niin a sawi thin. BJP-ah a inpek hnuah pawh thuneihna duh vangin Congress a zawm leh ren rawn bawk a, chutiang chu a ni ve. Mahse, Arunachal Pradesh thalaiten an duh a, an ring tlat a, MP-ah an thlang tling zel a, tunah chuan Union Minister dik tak, independent charge la ngat a ni ve ta a ni.
Rijiju hi Arunachal West atang hian 2004-ah MP atan thlan tlin a ni a, 2009-ah vote 1314 leka a khingpui hneh lovin a tla leh a. 2014 leh 2019-ah MP a ni nawn ta a ni.
Rijiju anga thalai thluak tha hi Mizoram hian kan nei ve em? Kum 40 vel chauh ni chunga Central Minister ni thei tur Mizo thalai hi kan awm maithei. Mahse, keini chu MP atana kan thlan chhuahte hi thalai aiin upa tawh lam an ni deuh zel. Chumi piah lamah chuan Arunachal Pradesh politician-te hi chuan an state awmna, international boundary an nihna hi keini politician-te ai chuan an hmang thiam deuh a ni ang.
Rijiju a minister nawn awn awn hian kan state politics khelh dan kalphung sawi danglam ngai thenkhat min ngaihtuahtir thei awm e.

Comments

Post a Comment

Popular posts from this blog

Thiago Alcantara

-
Ram pathum tan khel thei a ni a, mahse, Spain ram tana khelh a thlang a. Brazil mi a ni a, Italy-ah piangin, Spain ramah a hun tam zawk a hmang bawk a. Premier League champion lai Liverpool-in Bayern Munich a\anga an lak luh Thiago Alcantara hi tunlai football khawvela mimal chanchin sawi hnem ber a ni hial awm e. I han sawi ve dawn teh ang. Nau awih thiam mi pathum Thiago Alcantara chanchin bul thut hre tur chuan kum 1994 World Cup, USA kha va sawi thlen a ngai! Kha World Cup-ah khan Brazil an champion a, an match zawng zawngah Iomas do Nascimento,  ‘Mazinho’ ti-a hriat zawk chu a khel kim vek a. Mahse, field chhunga a chet danah mi mit fukna a ni em em lo va, hriat reng tur thil a ti mang lo.  Quarter-final a ni a, Brazil leh Netherlands an inkhel a. Brazil striker Bebeto chuan  Brazil tan chakna goal a khung a, field sir lam panin a tlan a, Mazinho leh Romario-te chuan an va ûm pha a, an pathumin nau awi ang takin an ti kual ta vel a. Chu chu Bebeto-a fapa piang hlim a...
Read more

The Grassmayr Foundry

-
Image
Zirtawpni tlai tin hian Austria rama Innsbruck khuaah, Leopoldstrasse leh Olympiastrasse kawng pengthuam lai taka workshop pakhat, a chhung thim deuh rupah chuan kut themthiam tlem tête chu hun pawimawh leh danglam tak lawm turin an kal khawm a. Kawr var ha pakhatin a tawngtaina an neih chu kaihruaiin, ani chu puithiam ve-a an neih a ni a. Lal Tawngtaina chu phun bul bulin an sawi rual a, pawn lam atang chuan hriat theih a ni lo. An hnuaiah chuan metre 6 zeta thuk lei laih khuar atang a awm a, chuta tang chuan thil êng set set pakhat hi a rawn chhuak bawk a. Chu hmunah chuan pulpit a awm lo va, dawhsan pawh a awm hek lo. Kut themthiamte chuan an hmaa rem tlar dar chi hrang hrang, mawi tak taka chei chu malsawmna thu an chham a. Chung darte chu Swahili tawng te, Greek lehkha ziala thuziak leh Arabic tawng tein a tlangah thu a inziak hlawm a ni. He mite hi tu dang ni lovin, Grassmayr Foundry hmun thianghlim an tih maia dar (bell) siamtute niin, an tan chuan darte chu bungraw thia...
Read more

The US Open

-
Image
US Open, tennis infiamnaa Grand Slam an tih pali zinga kum khata an khelh hnuhnun ber thin, hard-court Grand Slam awmchhun chanchin hi i’n bih chiang teh ang. A tirin Kum 1881 August thla khan US National Championships chu Newport Casino, Rhode Island-ah an khel tan a. Hei hi tuna US Open lo chhuah tanna a ni a, mahse, US Open khelh tan hunah an chhiar chuang lo. Wimbledon tih lohva Grand Slam upa ber a ni a. A tirah chuan mipa singles leh mipa doubles chauh an khel a. Kum 1877 khan hmeichhe singles an telh a, a hnu kum hnihah hmeichhe doubles pawh an telh leh. Grass, Clay leh Hard court US Open hi Grand Slam zingah grass court, clay court leh hard court-a khelh vek tawh awmchhun a ni a. Kum 1974 thleng khan grass court-ah khelh a ni a. 1975 atanga 1977, kum thum chhung kha clay court-a khelh thin a ni leh a. 1978 atangin tuna an khelhna hard court-ah hian khelh a ni leh ta a. 1914 thleng khan Newport Casino-a grass court-ah an khel thin a, 1915 khan West Side Tennis Club, Forest Hills...
Read more