An Taksa An Hlan Ngam!

Bible-a kan hmuh Babulon ram hi Babel in sang sak tuma mihringte an fuankhâwmna hmun, Pathianin an tawng a tihhran tâk avanga buai zo tate awmna hmun kha a ni an ti. 

Babulon lal Nebukadnezzara (Nebuchadnezzar) kha pa mak tak chu a ni. A hma lawkin Daniel-a Pathian chu 'pathiante Pathian' a nih thu a sawi zo chiah a; Daniel-a leh a thiante chu a chawisang a, Babulon ram bial chungchanga hotuah a dah nghe nghe kha a ni a. Mahse, a hnu lawkah milim a siam a, 'chibai bûk tur' a ti leh si!

Daniel-a thiante hi Babulon ram bung thenkhata governor an ni awm e. Chutiang mi pawimawhten lal thupêk an zawm lo chu lal tan chuan a thinrimthlâk ang. An chungah pawh tawngkam a duhtui vak lo. 'Ka kut atâ chhan chhuak tur che u pathian chu tu a ni nge?' a ti siah siah mai!

Sadraka te, Mesaka te, Abednegoa te pawhin lal thusawi dan chu an ngaihdan a ni bîk lo. An chhan danah pawh an chunga lal, anmahni siam liantu a nihna a lang lo va, mawihawih an zawng lo. An Pathian, 'pathiante Pathian' ngei mai a han cho dan chuan an thin a tirim ve a ni ang, "He thuah hian kan chhan che pawh a ngai lo ve," an ti! "I thusawi hi kan tan chhan tlâk pawh a ni lo va, chhan tham pawh a ni nek lo ve," an tihna a ni. Na tak a ni!

Sadraka, Mesaka leh Abednegoa te hian hlau lo tak an ni. An Pathian chu an hre chiang a, rawhtuina mei (furnace of blazing fire) lak atang chuan a chhan chhuak thei tih an chiang. Chhan chuak dawn lo pawh ni se Nebukadnezzar-a milim chibai bûk an tum lo. A chhan pawh Israel-te Pathian chuan pathian dang hmaa a mite kùn a phal si lo va!

Bible zir mite chuan Babulon rama mi chêng tam ber hi Kaldai mi (Chaldeans) an ni a, amah Nebukadnezzar-a ngei pawh hi Kaldai mi ni-a ngaih a ni an ti. Khatia, Nebukadnezzara a buai a, ama mumang pawh sawi thei lo, mumang neia inhre si-a a awm lai khan Kaldai mi fingte khan engmah an hrilh thei lo va; thi mai tur an nih tawh hnuah Daniel-a'n a rawn chhan chhuak a nih kha. An tan chuan lâwma thâwk huaina tham a nih nen, Nebukadnezzara'n Daniel-a leh a thiante a chawimawi a, Daniel-a chu lal ina rorelnaa a dah a, a thiante pathum pawh ram bung hrang hrang enkawl tura a dah ta mai kha Babulon ram mi leh sate tan chuan a ngeiawm ta a ni. Hnam dang, Juda miin Kaldai mi rawn hmakhalha roreltua an awm ta kha Kaldai mite khan an ngaithei lo vang tih a chiang.

Tichuan, lalin milim chibai bûk tura a tih chiah khan Kaldai mite chuan Juda mite hekna tur chu an rawn hmu ta chat a. "Juda mi thenkhat, Babulon ram bial chungchanga hotua i siam te khân i pathiante rawng an bawl lo va, rangkachak milim i din chu chibai an bûk hek lo," an ti ta chat chat mai!

Kaldai mite chuan tifuh an inti a, mahse, an pathian nêpzia leh pathiante Pathian ropuizia lanna tur a ni tih an hre lo.

Sadraka, Mesaka leh Abednegoa te khân rangkachak milim chibai an bûk loh chuan an chan tur chu thihna a ni tih an hria. Mahse, an hlau tlat lo. Helai boruak inmun vel hi a ropuiin a râpthlâk danglam ngawtin ka ring.

Nebukadnezzara thinrim hmai sen tun tawh chuan meipui chu a tihsat belhtir a. A pasaltha, mi chak leh indo mi (valiant warriors) te chu Sadraka te thianho phuar hlâwma meipuia paih turin thu a pe ta a nih kha. Khatih lai vel kha mipui tam takin an lo thlir ngei ang a, rimawi an tum ri ruai ruai ang a, meipui chu a alh hlup hlup ang a; kil khat atangin anmahni hektu Kaldai mite khan nuihsawh takin an lo thlir bawk ang a!

A paih lûttute pawh mei sa lutuk avanga an thihna meipui chhungah chuan Sadraka, Mesaka leh Abednegoa te chu him pialin an awm a, an him a ni satliah lo; mei rim pawh an nam lo!

An rawn chhuah leh hnua Nebukadnezzara thusawi hian Pathian tana inpe ngamte chunga Pathian rinawmzia leh mihringin Pathian tana a taksa a hlan ngamnain Pathian thiltitheihna a tawng buakzia a tarlang chiang ngawt mai.

Nebukadnezzara chuan, "..chûng mite chuan an Pathian chauh lo chu pathian dang rêng rawng an bàwl loh va, chibai an bûk loh nan, lal thupêk tidanglamin an taksa an hlan ngam a." a ti a nih kha!

Daniel-a thiante pathumin an Pathian tan a, an taksa an hlan ngamna chuan mite thinlungah an Pathian chu Pathian tak a ni tih a lantir a, Nebukadnezzara, rangkachak milim dintu ngei pawh chu Pathian chawimawi lo thei lovin a siam a, "Sadraka te, Mesaka te, Abednegoa te Pathian chu fakin awm rawh se," a ti ta hial mai!

Mi dangin an Pathian an fak loh theih lohna tur khawpa Pathian ring a, an Pathian tana an taksa hlan ngam hêng mipa pathumte atang hian zir tur kan ngah ngawt mai.