Khawngaihna Pahnih

An inah pawh a lo awm lo va, thenawm inah a lo kal zawk lai a ni a. Mi eng emaw zât an rawn kal khup khup a, an zinga pakhat chuan buhfai ip a rawn pu vu vu bawk a. A fanu tê chuan, "Nu, mi an rawn kal," a rawn ti a, a tlan haw nghâl hlawk hlawk a. 

Chu mite chuan buhfai ip khat leh pawisa eng emaw zat an rawn pe dawn a lo ni! An ding a, 'Hei, Krismas hlim taka in lo hman ve nan kan ti a, eng tham phei chu a ni lo va," an ti a. An hlan a; an kal leh ta mai a!

A lawmzia chu sawiin a siak lo. A fanu nen chauh an awm a, a fanu chu a dam hleithei lo va, an pawisa hmuh ve apiang ni tin mamawh leh a fanu enkawl nan an hmang zo zêl a. Tûn Krismas-ah pawh hian a fanu chuan kawr thar a nei ve thei dawn lo niin a hria a, a lungngai viau a. Mahse, chu mite pawisa rawn pêk chuan a fanu mai ni lo, amah nen lama kawr thar leina a daih. Buhfai lah, ip thar hlak khat tawp an rawn pe bawk a! A lâwm lutuk hi a ni tawp mai!

Mahse, a lawm êm êm lai chuan a rilruah zahna nasa tak a rawn lût a. Mite tanpui ngaia a awm chu zahthlâk a ti, a duh vang ni lo mah se, chutiang dinhmuna awm aia hrehawm chu a awm lo tih a hria. Thilpêk rawn petute kha an va fel tak êm! Amah chu an hria pawh a ni lo va, a rawn kalte pawh a hmel hriat an ni hek lo. A lâwm lutuk khan lawmthu lo hrilh nachang pawh a hre mang lo a nih kha. Mahse, thilpêk an hlan laia mi panga vel laiin phone camera hmanga an thla an lo la kha!

Ni, a retheih avangin mite tanpuina a mamawh a, chu pawh chu a tan a zahthlâk êm êm tawh. Thilpêk a dawng lai, a hmêl bawrchhawr lai tak lehnghâl chu camera panga vel laiin an tin a, an hmet ri tliar tliar a nih kha! 

Awi! 

A thlalâk chu khawi khawiah nge an post ang le!? Mirethei, tanpui ngai, mi tanpuina avanga nung ve mai mai a ni tih a inhria. Mahse, chu a retheihna chu mi tam tak hmuha pholan sak a nih dan tur a ngaihtuah chuan hrehawm a ti. A dinhmun harsatna chuan zah sawi theiin siam lo mah se, a thinlung chhunga zahna chu a reh ve chuang si lo!

* * * * * * * * * * * * * * * * * * * * * * * 

A fanute pathum a hruai a, naupang inawmlemna chi hrang hrang an zawrhna dawr kawtah an ding a. A fanu chuan Barbie a duh a, pakhat 200 man lai a ni si! 

Cheng 800 lai chu a la nei. Mahse, a fanu pakhat chu Barbie a leisak chuan a unaute tan thil dang a leisak a la ngai leh dawn bawk a. Tel lei an la ngai a, sahbawn te, sahriak leh thil dangte pawh lei an la ngai. Engtin nge a tih ang? A fate pahnih chuan thil dang an lo kâwk mek bawk si!

A fate chuan an awt ngawih ngawih a, an hmela an awhzia lo lang te, an nei dawn ni-a an hriat avanga hlimna lo langte chu a hmuh hmaih lo.

Chutih lai tak chuan a hnunglam atangin mi pakhat hian a darah a rawn khawih a. A han melh zauh a. 

"Ka pi, i dam maw, kan va inhmu ngai lo ve?" a ti a. A rawn chibai a. 

A kuta chu pa kut a va vawn chiah chuan lehkha a hûm tel nghâl tih a hria. A lehkha tlang thap dan atang te, a khawng deuh dan atang te chuan pawisa a ni ang tih a ring thiam nghâl. 

A rilru chu a so nghâl bulh bulh a. Sawi ngaihna pawh a hre lo. A rawn betu chu a hmel hriat ngai pawh a ni lo, "Nia..." a ti ringawt a. An inthlah a, chu pa chuan lehlam a hawi a, a kal leh ta daih a!

Chu pa chu a han melh khan melh thuak chauh a ni a. Lukhum lum a khum a, a hnar leh hmui khuh bo turin hmaikawr phelin a intuam bawk si a; a hmel a hre lo rêng rêng a. A han en zui leh dawn chuan mipui zi nuai nuai karah chuan a lo pil bo leh hman daih tawh si! Eng ang hmel pu nge tih a ngaihtuah chhunzawm thiam lo.

A kut chu a pharh a, a han en a, cheng 500 tlang pahnih chu invial tê takin a lo hûm reng tawh a!

Awm ngaihna pawh a hre lo. A rilru chuan a tawngtai nghâl a, "Lalpa, tunge kha pa kha? Nangmah i ni tiraw?" a ti mawlh mawlh a, a mittui a dang seng lo!

* * * * * * * * * * * * * * * * * * 

Chutichuan, mi hnêna englo i pêkin, mi vervêkten mi fak an hlawh theihna tûra inkhâwmna inah te, kawtthlêrah te an tih ṭhin ang hian, i hmaah tawtawrâwt hamtîr suh. Tihtakmeuhvin ka hrilh a che u, an lâwmman chu an hmu zo tawh. Nang erawh chuan mi hnêna englo i pêkin, i kut ding lamin a tih chu i kut vei lamin hre suh se, i englo pêk chu a rûkin a awm theih nân; chutichuan, i Pa a rûka hmu ṭhîntu chuan a rûl ang che.

- Matthaia 6:2-4