Saddam Hussein-a Nupui leh a Ui

Kum 1979 a ni a. Saddam Hussein-an Iraq rama ro a rel tan tirh lam a ni. Kum 10 an tlin hmaa an nu leh pate remruatna hmanga innei Saddam-a leh a nupui Sadija Talfah-te pawh inrem leh inngeih taka an la inneih lai a ni a, fa pawh panga lai an nei a ni.

Iraq ram hotupa Saddam-a chuan a nupui leh a fate himna chu a ngaihtuah hlê a. Ui huaisen, thu âwih thei, hlauh nei lo, fing, rinawm, inringtâwk, bengvar êm êm mai - Dobermann leiin, chu ui hmingah chuan 'Mukhtar' a sa a! Chu ui chu a nupui fanaute vengtu tura a tih avangin ngun taka zirtir a ni a. 'Mukhtar, go' an tih hlek chuan an bula awm ve midang chu a bei nghâl chat mai thin a ni.

Ni khat chu, Saddam-a nupui Sajida chu an in bula tuikhuahah a chêng a. Tuikhuah atanga a rawn chhuak, a towel a lâk dawn lai vêl tak chuan an ui chu lo kalin, tuikhuah kotlangah chuan a lo ding ve ran a. Sajida chu hmeichhe nunrâwng tak, an chhiahhlawhte pawh tiduhdah fo thin a ni a, an rante chungah pawh ngilnei lo zet a ni a. Chutia a bula ui lo awm ve chu ngaithei lo zetin, engmah ngaihtuah lêm lovin, 'Mukhtar, go,' a ti ta mai a!

Amah Sajida sawi dan takin, a thusawi chuan chu ui chu tih tur a hrilh a, tu emaw bei turin a hrilh a ni. Mahse, ui chu a hawi kual ruai ruai a, midang tumah an awm si lo. Mihring a hmuh theih awmchhun Sajida chu a pan a, seh a tum ta a. Sajida a inngaihtuah fel hman hlauh. A towel chu a la a, ui kaah chuan a lo hnawh a, a seh thei ta lo hlauh a. An buai ri hriain vengtuten an rawn chhan ta hlauh va, Sajida chu hliam engmah nei lovin a chhuak ta hlauh a ni.

Chutianga a ui leiin a nupui a lo sual chu a thinrim ngei mai. A ui chu a office-ah kovin, a chungthu a relsak ta a. Amah vengtuten hruia an hlin, an kaih lai Dobermann ui chu riltam, tuihâl leh hrehawm taka thi turin a chungthu a relsak ta a. A duh ang taka a zirtir, a zirtir ang taka hna pawh thawk thin ngei chu thi turin a chungthu rèl a ni ta.

Ui chuan Saddam-a office a chhuahsan hmain hremna hmasa a tâwk phawt a. Electric hmangin vawi li a dep a, ui chu a chiau vawng vawng mai a ni.

Chu ui chu thi tura a chungthu rel a ni a, awlsam taka thi tura tih a ni lo thung. Saddam-a ngaihdanah chuan lal chhungkaw member tihnat tuma beitu chu a rei thei ang ber hrehawm taka awmtir a, chu hrehawmna avanga thihtir tur chu a ni tlat a. Mukhtar chu a rei thei ang ber hrehawm tawrhtir tur a ni.

An tuikhuah bulah chuan thîr ban rinawm tak an phun a, chutah chuan Mukhtar chu nghet takin thlun a ni a. Saddam-a ngaihdanah chuan tuikhuah bulah, tui hmu thei rengin, a rim hre thei rengin awm se, in thei si lo se a hrehawm lehzual dawn a! Chu mai chu a ni lo, chu ui khawngaihthlâk tak chu a nghawng leh ban chu nghet taka tawn belhbawm a ni a. A ding ngil thei lo va, a thu thei bawk lo va. Chutiang chuan ni sensa hnuaiah, engmah ei lovin, tui pawh in lovin ni tam tak hun a hmang ta a. Saddam-a leh a fapa Uday-a, Saddam-a ai maha nunrâwnga an sawite chuan ni tin an en a. Uday-a chuan electric hmangin a shock zauh zauh bawk a ni.

Chu ui tawrhna chu a rapthlâk lutuk a, hmeichhe nunrâwng, mi khawngaihna pawh nei lova an sawi thin Sajida meuh pawhin en hrehawm a ti hial an ti a. Saddam-a fanu, an pang ber Hala phei chuan a khawngaih takzet a. Mahse, tuman Saddam-a lak atanga chhanchhuah tumin hma an la ngam lo.

Mukhtar chu thi mai tur a nih tawh laiin Sajida enkawltu doctor chuan ni khat chu Sajida dinhmun ena a rawn kalin chu ui chu a hmu a, a chanchin a hre ta hlauh a. Saddam-a hnênah chuan a in vengtu tur ui a duh thu leh thi mai tura dah tawh Mukhtar chu a pe phal em tih a zâwt a. Saddam-a chuan ngaihtuah mang lovin a pe ta mai a ni an ti.

Chu doctor chuan Mukhtar chu a la ta a. An phuarna hrui a phelh laite chuan hrui leh ui taksa chu a inbelhbawm deuhthaw hial a, Mukhtar chu a chau êm êm a, amaha kal thei ziazang a ni lo a. Doctor chuan pawmin, a car-ah a dah a, in lamah a enkawl ta a. Vanneihthlak takin Mukhtar chu a dam chhuak leh a ni.

Saddam-a hi Islam sakhaw zirtirna zuitu peng pakhat leh a peng lian ber - Sunni Muslim a ni a. Chuti chunga a ui hminga 'Mukhtar' ti a phuah/sa ngat hi a mak hlê. 'Mukhtar' tih chu 'Thlan bîk' (The chosen one) tihna a ni a. Muslim hovin an sakhaw zawlnei ropui bera an ngaih Muhammad-a pathianin a kohna hming pakhata an ngaih a ni a. A nihna takah chuan ui hminga 'Mukhtar' tih phuah chu Islam sakhaw puithiam/zawlnei ropui ber Muhammad-a zah lohna lantirna chiang ber a ni hial maithei!

Saddam Hussein-a nupui hmasa ber Sajida Talfah hi Saddam-a patea/putea (uncle) fanu a ni a. 1963 vela innei an ni a, a inneih ni hriat a ni tawh lo. Fa panga - Uday, Qusay, Raghad, Rana, leh Hala an nei a. Sajida hian a cousin Saddam-a a neih hma hian school-ah zirtirtu hna a thawk thin.

Hmeichhe danglam ve tak, Europe ram mite incheina ngaina, designer cloth leh tlereuh inbel nasa thei tak, a sam dum hlap mai duhtâwk lova tibuang thin a ni a. Ngo a châk êm êm a, powder a inhnawih nasa thei hle a, amah hmutu sap hmeichhe pakhat phei chuan a powder inhnawih nasatzia sawiin, 'Tuin emaw chhangphutin a theh ni mai awm a ni,' tiin a ziak.

Baghdad khawpuia dawr neitute chuan Saddam-a nupui Sajidi chu an dawrah a lût ang tih an hlau hlê thin an ti. A chhan pawh Sajidi hian eng pawh lei se a man a pe kim ngai lo a ni awm e!

Saddam hian Sajida aiin pasal nei lai Samira Shahbandar a thlang a, Shahbandar-i pasal hi chuan fing taka a kalsan mai laiin, Sajida hi chu hmeichhe khirh ve tak a nih avangin awlsam takin a kiang lo chiang hlê a. Saddam-a leh a chhungte tan buaina a siam nual. Mahse, Sajida hi a tawpna hriat a ni ta lo a, khawiah nge a thih a, engtin nge a thih hriat a ni ta lo va; tûn thlengin a tawp dan hi rinthua sawina bak hriat tur a awm ta lo a ni.

(1st April, 2020: Novel-Coronavirus vanga pawn chhuak thei lova khawvel ram zawng zawng deuhthaw kan tawmim a, kan inkharkhip laia ka lehkhabu chhiar - Mayada - Daughter of Iraq by Jean Sasson behchhan leh internet lama ka en belh ka ziah vel mai mai a ni e.)