Tablighi Jamaat

Muslim hovin Delhi-ah khawmpui an nei a, Covid-19 an theh darh vak dawnin a lang tih chu a nawlpui titî a ni mai a. India ram khawpui ber Delhi-a khawmpui nei Tablighi Jamaat-te hi tute nge, eng pawl nge, engati nge Delhi-a khawmpui an neih? tihte hi pawn chhuak thei lova awm mekten i lo chhiar leh mai mai ang u hmiang.

He pawl, Tablighi Jamaat hi Islam sakhaw zuitu - Muslim-te pawl pakhat niin, 1926 khan India hmarlam Mewat bialah Isalmic scholar Maulana Mohammed Illyas Kandhlawi chuan a din a ni.

Mewat hi tunah chuan Haryana state-a district pakhat niin, India rama district changkâng lo/hnufûm ber pakhat niin, mi nuai 11 vel an chêng mek a. Mewat bialah hian 'Meo Muslim' inti nuai 5 vêl an awm a. Hengho hi a tirah Hindu sakhaw betute niin, Muslim-ah an inlet a. Hindu pathian - Rama, Krishna leh Arjuna thlah kal zêl niin an insawi a. Hindu leh Muslim sakhaw serh leh sâng la kawp an ni a, an hlâ te pawh Hindu epic-a innghat a ni hlawm a. Tûn thlengin Holi, Diwali leh Dussehra-te pawh an la lawm vek a ni.

Maulana Mohammed Illyas Kandhlawi chuan British lalho rorelna hnuaiah an nunphung leh an sakhuate chu pawlh dal mek nia ngaiin he pawl hi a din a. Khawvêl puma Islam sakhaw zirtirna dik (True Islam) put darh chu an thil tum a ni a. India ram atanga Pakistan leh Bangladesh an indan hma khan nasa takin an pawl hi a thang lian a. Independence hnuah pawh Pakistan leh Bangladesh-ah Tablighi Jamaat pawl hi an la kal vung hlê zêl a ni.

Jamaat dintu Mohammed Ilyas chuan, "Muslim-te chu Muslim tha an ni tur a ni," tiin a lo sawi tawh a. Chu chu tûn thlenga he pawl thupui niin, khawvêlah nunphung dik leh tha, Islam sakhaw zirtirna nena inmil din a nih theih nana hmalâk chu an tum ber a ni a. An member-te chuan politics rawngkai lo pawl, Koran zirtirna anga Islam khawtlang din chu an pawl din chhan a ni tih an sawi thin.

Jamaat hian kum tin an mi leh sate chu ram hrang hrangah tir darhin, an member-te chu Muslim dang inah kal kualin, an sakhaw zirtirna chu an va hrilh thin a ni.

Kumin March ni 3-a Delhi-a inkhâwmpui an neih kha kum tina an neih thin niin, India ram mai ni lo, khawvêl hmun hrang hrang atangin an kal khâwm a. Kal khâwm zingah hian Covid-19 kai, ram dang atanga rawn kal awmin, an inkai darh nasa hlê tih hriat a ni a. He khâwmpuia kalte hi zawn mek zêl niin, tam tak hmuh chhuah an ni tawh a, hêng mite hi sorkar chuan a rem dan danin an khung hrang (quarantine) a ni.

Tablighi Jamaat pawl hi khawvêl huap sakhaw pawl lian tak ni tawhin, khawvêl ram hrang hrang 80-ah member awmin, Indonesia, Malaysia leh US-ah te an tam viau a. An awmna ram theuhah hmunpui nei mah se, hmannia an khâwmpui hmanna, Delhi-a Nizamuddin-a an hmunpui kha he pawl hmunpui ber (Markaz/Markaj) a ni reng a. Nizamuddin hi Delhi khawpuia Muslim tamna veng niin, an Markaz-ah hian Muslim biakin (mosque) leh riahna hmun, mi sangnga vêl lenna a awm. Pawl rethei tak chu an ni lo.

Jamaat hian Bangladesh-ah pawh khâwmpui lian - Biswa Ijtema an tih mai an nei thin a. Hei hi Haj tih lohvah khawvêla Muslim intawhkhawmna lian ber niin an sawi.

He pawl member zingah hian mi langsar tak tak an awm. Pakistan ram cricket member langsar ni thin, 1990 chho vêla khawvêla batsman lâr Shahid Afridi te, Inzamam ul-Haq te kha he pawl member an ni a. South African cricketer Hashim Amla pawh he pawl zawmtu a ni a. Pakistan President hlui pahnih Farooq Legari leh Mohammed Rafiq Tarar-te pawh he pawl zawmtu ni-a hriat an ni a. India ram President hlui Dr Zakir Hussain pawh he pawl thiltiha lo tel tawh thin chu a ni ngei bawk.