Thinlung Thawnthu

Mita hmuh leh benga hriat hi,
A taka thleng a ni fo thin.
Mita hmuh chu kan hria a,
Benga hriat pawh kan hmu thei;
Thinlunga a cham avangin!

Thinlunga cham chu kan hmuh a ni a,
Benga hriat pawh thinlungah a cham fo;
Hmuh leh hriat a chian leh chian loh te,
A ni, kan hriat reng thil te chu;
Thinlunga hmun a valh thûk athuin a hril zâwk!

Thinlunga awm chu pawnah a lang a,
Thinlung chhungril chu hmelah;
Nuih hi chhunglam vang a ni a,
Tah pawh pawnlanga lang ni mah se,
Thinlunga awm vang a ni zâwk!

Thinlung chhung chu hmuh loh thil a ni a,
Hmuh loh chu hmelah a rawn lang thung a!
Thinlungin a ngaihtuah angin kan nung a,
Rilru hawi loh dana nung kan awm bawk a;
Chu chu thinlung thawnthu makna a ni!

Hmuhsitna hi pawnlam thil a ni lo va,
Chapona hi kut leh ke thil a ni lo;
Mahni hmasialtu hi thinlung a ni a,
Zâwldawhna pawh thinlung hnathawh!
Duham, îtsik pawh - Thinlung thawnthu vang!

Mihring ngaihtuah hun liama danglam chu,
Thinlungah a vir vêl reng a;
Cham hlen turin hmun a ngah tâwk a,
Paih bo turin hunin a thunun lo;
Thinlunga pawimawh chu a bulpui!

Kan hmuh te hi a lem a lo ni a,
Kan hriat te hi a dik lo fo;
Hmuha duhna hi eng chen nge?
Hriata fiahna huam chin mi hrilh teh;
Thinlung thawnthu nen a inzawm em?
Thinlung nge lal mit leh beng?

A lema nung thin mihring hi,
Vawi tam a nui lui thei a;
A lem leh a tak chu pawn lamah,
A chhâwkin kan lantir a,
Thinlung thawnthu ziding erawh;
Chhungrilah nghetin a ding reng a!