Vikas Dubey - The Infamous History-Sheeter

Kar hmasa Zirtawpni khan Uttar Pradesh-a Kanpur khaw daiah police-te chuan misual pakhat Vikas Dubey chu man an tum a. Man an tum tih a lo hre hman a, police a lo chêt khalh a, a hote nen pariat lai an lo kâp hlum a. Police-te chuan a luman siamin, an zawng zui a. Tunkar Ningani khan Madhya Pradesh-a Ujjain khuaah an man leh ta a ni. He Dubey-a chanchin hi a danglam ve hle.

Police-te nen an inkah lai khan Dubey-a in chhungah hian Daya Shankar Agnihotri chu a awm ve reng a, UP police-te chuan Chawlhni khan manin thu an zâwt fiah a. Dubey hian police-te hian man tumin a in an rawn pan tih a lo hre hman niin a sawi a. Police SHO Vinay Tiwari chu Dubey-a hnêna an thurûk hrilhtu ni-a hriat a ni a, a hna atangin chawlhtir a ni nghâl. Tiwari hi Special Task Force (STF) te chuan an dâwp a, Dubey hi phone hmangin thurûk a lo hrilh tih a puang a ni.

Agnihotri chuan police-te hnênah Dubey in an rawn thlen hma hian Dubey hian phone call a dawng a, police station atanga call lo kal ni ngeia a hriat thu a sawi a. Hemi hnu hian Dubey chuan a hote mi 25 atanga 30 vel chu ko khâwmin, police-te chu an lo ambush ta a, pariat lai mai an lo kâp hlum a ni.

Agnihotri chuan Dubey leh a hote hi Kanpur-a a inah hian an inhmu khâwm fo nin a sawi bawk.

Dubey-a in hi sorkar chuan bulldozer hmangin an tichhe vek a; amah an zawng nghâl a. An buaina ber erawh chu Dubey call details chu a ni. Dubey hian police 24 vêl lai mai a lo be kual a, hei hian police-te rinawm tawk lohzia a pholang hlê a ni.

Hetianga police pariat lai nunna a lâk tak avang hian Dubey chanchin hi an han chhui chiang deuh a, thubuai la rel fel loh 60 lai a lo la nei a. Heti chung hian STF-ten police headquarters lama an thawn thin misual langsar zingah a hming a lang ve miah lo a. A misual pawl neih pawh police record-ah a lo awm lo hrim hrim bawk!

Hetianga an han chhui chian chhoh tak zêlah chuan Lucknow khawpuia a unaupa inah chuan sorkar motor man a ni a. Dubey unaupa Deep Prakash chuan kum 2014 khan sorkarin an lilam Ambassador car chu a lo lei a, a hmingin a thlâk lo va, fitness certificate pawh nei lovin, chhiah awl ru reng chungin a lo hmang kual vêl reng mai tih an hmuchhuak leh bawk a ni.

He Ambassador car hi kum 2004 khan state sorkar chuan leiin, Governor principal secretary hmingin register a ni a, kum 10 hnuah  an lilam leh ta a. Dubey hian he Ambassador car hi a hmang tangkai hlê a, mi tam tak chuan sorkarin a hman tura an pêk emaw an ti hial a. Politician leh sorkar officer eng emaw zat a hmuhnaah a keng thin an ti.

Kanpur police-te chuan Dubey in hnuaiah hian bunker an hmuchhuak a, chutah chuan puak thei leh ralthuam eng eng emaw an hmu bawk a. Dubey leh a hote hian police an lo lambunnaah khan AK-47 rifle, INSAS rifle leh pistol 3 lai an lo rûksak hman a. Police thi tate ruang an postmortem-naah chuan Dubey hote hian police thenkhat chu an kut leh ke te an lo tansak tih sawi a ni!

Dubey hi kum 2001 khan police station-ah UP Minister of State Santosh Shukla thattuah puh a ni a. A that tih hretu pawh mi 25 lai an awm a, mahse, mak tak maiin thiam changin a chhuak leh daih!

A tleirawl lai atangin ho neiin suahsual rawng a bawl tan a. 1990 chho atang tawh khan rûkrûk leh mi rawk lamah a hming a lang fo a. Politician tam tak a tilâwm a, inthlannaah an chak theih nan tharum hmagin a campaign-pui niin an sawi a. Amah ngei pawh hian 1996 vel kha VC inthlan chuhin a tling ve nghe nghe a ni.

Tualthahna leh inrawkna thilah Court thlenpui a ni zing hlê a, mahse, thuhretu an awm loh fo thin avangin thiam a chang leh mai thin a ni an ti a. Politician leh sorkar hnathawk lian zingah hmelhriat a ngah a, thurualpui a nei nual niin hriat a ni a. Dubai leh UAE thlengin in a nei a, India ramah In 21 vêl a nei a, Bangkok hotel vêlah pawh sum a invest an ti a, nêp lo tak a ni! An man tâkah hian court a thlen chuan mualpho tur an awm nual dawn a, a thlen hmaa a thih ngei ring an tam hlê a, an ring dik ta chat a nih ber awm hi maw!