Pranab Mukherjee A Awm Ta Lo

Kum 2012 July ni 25 atanga kum 2017 thlenga India ram President, India President 13-na Pranab Mukherjee chu vawiin - August ni 31, 2020 tlai khan chatuan ram panin a kal ta.

Mukherjee hi kum 84-a upa niin, a fapa Abhijit leh a fanu Sharmishta-te a kalsan a. A nupuiin a lo thihsan tawh a ni.

August thla tir khan a thluaka thisen tling awm zaiin Army Research and Referral Hospital-ah dah luh a ni a. Hemi hma hian coronavirus hri a kai tih hmuh chhuah a ni bawk.

Congress politician hlun Pranab Mukherjee hi India mi zinga hriat hlawh leh ngaihsan hlawh ber pawl niin, nikum khan President Ram Nath Kovind chuan India ram sorkarin a mite hnena chawimawina a pêk theih sang ber - Bharat Ratna - chu a hlan a ni.

Kum 1935 December ni 11 khan West Bengal-a Birbum district thingtlang khua pakhat Mirati-ah lo piangin, Bengali chhungkua ami a ni a. University of Calcutta atangin Political Science leh History-ah Master's Degree a nei a, LLB a zo bawk.

Kum sawmnga chhung zet politics a khel a, hetih chhung hian Congress party-ah nihna pawimawh tak tak a chelh a. India Gandhi, Rajiv Gandhi, PV Narashima Rao leh Manmohan Singh-te Prime Minister-na hnuaiah sorkar khai dingtu pawimawh niin, dinhmun leh nihna pawimawh tak takah dingin a chelh a. Kum 2009 atanga 2012 chhung khan Union Finance Minister a ni a. Finance Minister a nih lai hian Reserve Bank of India (RBI) Governor tura Manmohan Singh ruatnaah a hming a ziak.

India ram politics huang chhungah leh mipui nawlpui zingah Mukherjee hian zah a kai hle a. President a nih chhungin Prime Minister pahnih - Manmohan Singh leh Narendra Modi-te a hrawn hman a, zahawm tak leh hmingtha takin a hna a zo a. A politics khelh hun chhung zawng zawnga a do ber BJP Prime Minister Modi chu President ni chunga lungrual taka a thawhpui thei chu fak a hlawh phah hle a. Modi nen hian an inngeihin, mipui hmaah pawh an infak dun viau thin.

Congress party-a thuneitu sang ber - Congress Working Committee (CWC) ah kum 23 member a ni thei.

Pa inngaitlawm, inbiakna hmanga thil sawi fel duhtu a ni a. Congress-a a thawhpuiten kal lo tura an hrilh hnuah nikum khan RSS hmunpui, Nagpur a tlawh a, sawisel a hlawh deuh a. Mahse, India ram chu ngaihdan leh duhdan hrang hrang neite awmna ram, inzah tawn tur kan nih thu sawiin amah sawiseltute a chhang let a, an sawi zui rei lo.

Zirna ngaipawimawh mi a ni a, President a nih chhungin India ram University thate khawvel huapa zirna in tha top 100-a lang an awm lo chu a vei hle a. Zirna lama thanna tel lo chuan India ran ram dang than ruala than a harsat ringtu a ni. 

Rajya Sabha-ah 1969 atang khan member niin, term nga lai Rajya Sabha MP a ni a, Lok Sabha MP pawh term hnih a ni a. A hriatna a tha a, a ngaihtuahna a fim a, thil thleng pawm dan a thiam a. India rama nihna pawimawh - Foreign Minister, Defence Minister, Commerce Minister leh Finance Minister-te ni thei vek a ni a; Planning Commission Deputy Chairman pawh a ni. Mi tam takin Prime Minister tura an rin leh beisei a ni a, mahse, a dam chhungin a ni ta lo.

Kum 2004 atanga 2012 chhuna UPA an sorkar lai khan Minister 95 awmna committee pawimawhah chairman niin, India ram kalphung siam danglamtu thutlukna pawimawh tak tak - administrative reforms, Right to Information, Right to Employment, Food Security, energy security, Information Technology and telecommunication, UIDAI leh Metro Rail-te chu a hova duan leh kalpui tan a ni a. Kum 1970 chhova India ram thingtlang khuaa bank hawn tan a nih chhoh lai khan hma latu pawimawh a ni a. National Bank for Agriculture and Rural Development (NABARD) dinna kawngah pawh a meizang hlaptu a ni.

Mukherjee hi sorkar laipui leh state-ten thil neih an intawm dan tur, Gadgil-Mukherjee formula an tih mai, 1991 atanga hman tan duang chhuaktu a ni.

Mukherjee-a pa hi Congress hruaitu thin niin, India ramin zalenna a sual laia tanina tang a ni a. Mukherjee hian lehkha a zir zawh hnuah college zirtirtu hna a thawk zawk a, journalist hna a thawk zawk bawk.

Ministry huang pawnah pawh hna zahawm leh dinhmun sang tak tak chelhin, IMF, World Bank, Asian Development Bank leh African Development Bank-ah te Board of Governors-ah a tel.

Lehkha chhiar nasa mi a ni a, lehkhabu pawh a ziak nual a. Kum 2008 khan India rama civil mite chawimawina sang ber dawttu ‘Padma Vibhusan’ hlan a ni a. Kum 1007 khan Best Parliamentarian Award hlan a ni a, kum 2011-ah Best Administrator in India Award hlan a n leh a. 1984 khan 'Euro Money' Journal-in Finance Minister tha panga a thlan chhuah zingah a tel.

India rama pa ngaihsanawm ber zinga mi Pranab Mukherjee pawh a kal leh ta. A awm lo vang vang tawh dawn naa, a hming hi India ram awm chhungin a reh tawh kher lo ang.