Joe Biden

1972 December ni 18 chuan Joe Biden chu Washington khawpuiah a awm a. A vawi khat nan Senator-ah thlan tlin a nih hlim a ni a, a office thar tur a en fel a, a staff turte be felin, an chhungkaw chenna tur in te a buaipui a. A unaunu Valerie chuan a pui vêl a ni.

Telephone a rawn ri a. Delware-a awm a unaupa Jimmy a lo ni a, a unaunu Valerie a biak duh thu a rawn sawi a. An inbiak zawh chuan Valerie chuan, an in lamah chetsualna chhe tê a awm a, "Lungngaihna tur a awm lo a, mahse, kan haw nghâl a ngai," a ti thung a.

Biden-a lakah thil awmdan a thup reng theih loh va. A nupui leh a fate chu Christmas Tree lei tumin an bazar a, chutah chuan an lirthei chuannaah an chesual a. A nupui Neilia leh an fanu sen tê Naomi-te chu an thi nghal a; An fapa la naupang tak tak pahnih - Beau leh Hunter-te pawh na takin an hliam a ni.

Washington-ah an chhungkaw chenna tur in a tifel chauh a, an chhungkua chu vuak sawm vek a ni zui a! Biden-a tan chuan a nat dan tur chu!

"Ka tawng thei lo a, ka awm chhungah hian ruak lian tak a awm a. Black hole-a tla lût tur ni mai hian ka inhria," tiin a chanchin a ziahnaah a ziak. 

Senate-a a seat pawh chu chelh chhunzawm loh a tum a, puithiam nih tumna a nei a. Mahse, a chang chuan tlaiah te hian khawlaiah a tei kual a, insualpui tur a zawng thin!

"Chutiang chuan tuman min hre ngai lo. Pathianin râpthlâk takin min bum niin ka hria a, ka thin a rim a ni," a ti.

Chutiang thil thlen hma thla khat liamtaah khan kum 29-a upa Biden chu Democratic party atangin US Senate-a thu turin thlan a ni a, Senator ni thei naupang ber dawttu a ni a. Richard Nixon-a hunlai, Republican vanglaia 'Democratic Party golden boy' an tih hial a ni.

* * * * * * * * * * *

Scranton, Pennsylvania-a khawsa thin an ni a. A pa chu sumdawng hausa ve tak ni thin mah se, Biden a pian chuan a hausakna a tlachhe vek tawh a, Biden hian a naupan lai hun tam zawk chu a chhungte bulah a hman a ngai hial.

A naupan laia hmuhsitna a tawh nasat ber chu - a dangâwk vang a ni. High School a kal lai te chuan miin an hmusit nasa thei hle niin Biden chuan a chanchin a ziahnaah a ziak a. A dangâwk hliah nan classroom-ah a awm nasa a, lehkha a chhiar nasa thin. An zirtirtu pakhat chuan a rual ban lohna chu fiamthu nan hmang thinin, "Buh-buh-Biden" tiin a ko thin a. Chu nu chu Biden-a nu-in vawi khat chu a hau a, "I thluak ka pirsak mai ang che," a ti niin Biden hian a sawi!

A dangâwk avanga a zah thinzia leh miin an tihduhdah thinzia sawiin, "Tun thleng hian ka zahna nasatzia leh min tihduhdah nasatzia kha chiang takin, a hun lai ang maiin ka la hre vek a ni," a ti.

High School a kal lai atangin darthlalang hmaah dangâwk lova tawng a zir a. High School a zawh rual chuan a dangâwk chu a thunun thei tawh a. University of Delware-ah a lût a, chumi hnuah Syracuse University-ah kal lehin, Neila nen an intawng a, an innei a. Hun rei lo tê ukil hna a thawk zawk a, a bang a, politics a luhchilh a. Rei pawh a awm hmain New Castle county council inthlan a chuh a, a tling a. US Senate inthlan a awm dawn a, Delware-a Senator ni lai, Republican party mi, term hnihna hmang zo tawh, chuh leh tum chu Democrats atangin khing duh an awm lo va. Tuman a chak zawk ring lovin Biden hian tlawmngaih chhuahin a khing ta a, a tling ta hlauh a; kum 29 mi chauh niin US Senator a ni ta daih mai a ni.

Delware damdawiinah, a fapa naupang tê tê pahnih dam lo enkawlna khum atangin Senate seat chu pawmin, rinawmna thu tiamin Senator atan lâk luh a ni ta a ni.

A fapa Beau Biden chuan a pa anga politics khelin, Delware attorney general hna a chelh lai, hmalam hun êng tak a neih laiin kum 2015 khan brain cancer vangin a thi hlauh a ni. 

* * * * * * * * * * 

Washington khawpuia hna a thawh hun hmasa lam kum 14 chhung chu ni tin Delware leh Washington inkarah lirtheiin a tlan thin a. A fate tan theihtawp a chhuah thin. 

School zirtirtu Jill Jacobs chu nupui atan a nei leh a, fa pawh pakhat - Ashley an nei.

1987-ah US President nih tumin a bei a, mahse, Democrats candidate a chang pha lo. Hemi hnu lawk hian New York-a hotel pindanah a tlu a, damdwiin panpui a nih hnuah a thluak chu a chhe hlen maithei tih hial a ni a; mahse, a dam chhuak leh hlauh.

Kum 20 a liam a, 2008 khan US President nih tumin a bei leh a. Candidate nih tuma a beih hma lawkin US President ni ta Barrack Obama chu 'African American zinga pa fel, fing leh tawngkam thiam, hmel hmuh nuam tak' a nih thu a sawi a. Chu chu New York Observer chanchinbu-in an chhuah a. A ni lo zawnga lain a khingpuite chuan a thusawi chu a hrilhfiah an phût a, a insawi fiah zo lo a ni chek ang, a tawpah candidate nihna a chang zo leh ta lo a ni.

Kum 2014 khan Nevada Democrat politician Lucy Flores chuan US Vice President Joe Biden chuan mawi lo takin a khawih niin a sawi a. "US Vice President hian thian hnai, chhungte leh ngaihzawngte min khawih dan tur ni awm takin min khawih a ni," a ti a. Biden-a tan insawifiah tul mah se, chuti takin a politics kalkawngah a nghawng lo.

Kumin US President inthlanan chuh a tumna kawngah hmeichhia bawkin an tibuai leh a. March thla khan a staff hlui Tara Reade chuan Biden hian 1993 khan office-ah khawih a tum tih a sawi a. Mahse, chanchinbu miten an han chhui chiang a, Reade hian thu dik lo a sawi tih an finfiah a ni.

Kum riat chhung zet Obama hnuaiah US Vice President niin hun a hmang a. Kum 2016 US President inthlan dawn khan Democrats candidate ni tura beih leh a tum a, mahse, Obama chuan Hillary Clinton a hneh a rin loh thu leh a beih chuan an party-in a chhiatpui a hlauh thu a sawi a; a ti lo a. Hillary leh Bernie Sanders chu na takin an inbei a, Clinton a chak a. Kuminah Sanders nen hian Biden chu an inbei leh ta a, awlsam angreng takin a hneh a, US President a chuh ta a ni.

Mihang hovin Biden hi an ngaina a. Kum riat zet mihang President, amah aia naupang daih hnuaiah hna a thawk a, chu chuan mihangho ngainat a hlawhtir a; tun tum US President-ah pawh a thatpui niin a lang. 

Kum 40 chhung US politics-a a inchiah hnuah, US President nih tuma vawi thum a beihnaah Presidential Candidate a ni hrâm a. President ni lai Donald Trump hian tihbuai a tum hle a, nakkum January ni 20-ah Biden hi lak luh theih a ni ang em tih chu khawvelin a thlir mek a ni.