US President-te Inthlâk Dawn Lai Vela Thil Thleng Thin Chu...

White House-a thuneihna inthlak dan hi kan ngaihtuah zawng a ni em le!? US President ni lai leh amah thlaktu tura thlanten engtin nge mawhphurhna an inhlan chhawn tih  hi hriat ve a tha awm e.

Republican party President Donald Trump chu Democrats lam President tur Joe Biden chuan a thlak dawn niin a lang a. President thar tur leh a team-te hi US sorkar agency pakhat - General Services Administration (GSA) chuan an lo tanpui thin a. Sum an ngaihtuah a, office hmun tur an zawnsak a, hmanrua leh thiamna (technology) thlengin an lo tanpui thin a ni.

Hetianga President ni lai leh a thar tur inthlak thleng tura inbuatsaih hun (transition period) hi a tlangpui -in kar 11 chhung a ni a. Inthlan result chhuah atanga January ni 20  inkar a ni deuh ber a. January ni 20 hi President tharin a mawhphurhna a lak ni a ni.

US President lâk luh ni hi mi pakhatin mi dang pakhat a thlakna hun a ni satliah lo va. US President an inthlak rual hian America ram politics lama hna leh mawhphurhna hrang hrang chelhtu mi sang li (4,000) vel zet an inthlâk ve nghal a ngai niin Center for Presidential Transition chuan an tarlang.

Hetianga thil inthlakthleng lai hian eng ber nge an tih tih chu zawhna awm thei a ni a. Staff hlui thlaktu tur staff thar inruat, chu mite tih tur leh mawhphurhna inhrilh hriat bakah President thar tih tur chi hrang hrang ruahman leh lo buatsaih te chu hemi hun chhung hian an buaipui ber a ni thin.

US President atana official candidate-te chu an ram venhimna kawnga an hriat tur awm te hrilh lawk vek an ni a. Mahse, President atana thlan tlinte chu hemi aia chiang leh zing hian national security chungchang hi hrilh an ni a. Hei hi an ngaihpawimawh ber zinga mi a ni a. President atana thlan tlinte chu January ni 20-a President atana lak luh an nih a, thu an tiam hma zawng chu ni tin security briefing neihpui an ni ziah thin.

Hetianga President atana thlan tlinte hnena ram venhimna chungchanga hma an lak tawh dan te, an lo kalpui mek te leh an hmachhawp te hrilh kîlh kêlh an nih thin avang hian a pawimawh hle a. Kum 2001 September ni 11-a US beihna pawh kha - kum 2000 inthlana George W Bush thlan tlin a nih a, President inthlakna tura thil tihfel ngai an tifel muang lutuk kha a chhan niin an sawi a. Dan pangngai angin President hi ram venhimna kawnga hrilh hriat tur zawng zawng hrilh hman ni se kha beihna kha a hlawhtling lo maithei an ti hial a ni.

White House-a hnathawktu inthlak a ngaih avangin White House bulah office belhchhahna siam a ni a. White House staff thar turte chuan a hluite hnen atangin zir ngai an zir a, an office-ah an kal a, a chang chuan an tih ai te an ti chho ve tan thin.

Kuminah khawvel huap hripui leng mek a awm avangin Joe Biden hi kum danga President thar turte aiin a hmanhlel zawk a. Health official pawimawh titipui vek a duh bakah America ram mipuite hriselna dinhmun zawng zawng hriat a duh avangin ni tina amah thu hrilhtute an phe suau suau mek tihna a nih chu!

Plolitical position an tih - sorkarna chang party-ten an inruat thin hna pawimawh hrang hrang 4,000 vel a awm kan tihah khan 1,200 vel chu Senate-in a pawmpui ngai a ni a. Chuvangin mipuite hriat lohva buaina a tam hle dawn tih a chiang.

President thlan thar team-te chuan sorkar official-te nena meeting an neih piah lamah ram dang hruaitute leh president atana thlan thar inbiakna zawng zawng buaipui  a ngai a. Hemi kawngah US State Department chuan an pui thin a ni.

President thlan thar leh a nupui-te chu White House fanpui an ni a, a chei danah tihdanglam tul tih an nei em tih te zawh an ni thin a. Hei hi chu Danin a phût ni lovin, tihdan phunga neih a ni.

Dan tlangpuiin GSA chuan President thar atana thlan tlin te pawmpuina lehkha an tichhuak thin a. Danpui-ah he lehkha hi engtika tihchhuah tur nge tih a inziak chiang lo va, hman sual a awm zeuh zeuh a; Trump-a pawlte pawhin kuminah hei hi hmang tangkaiin an delay hret a ni. Kum 2000 pawh khan inthlan result chu coutrt-a kalpui a nih avangin an buai rei hle a. Kuminah pawh November ni 23 khan GSA chuan lehkha an tichhuak chauh va, hei hi thil tibuaitu a ni thei tih a chunglamah kan sawi tawh kha.

GSA chuan president thlan thar chu a hriatpuina thu lehkha a thawn veleh hian sorkar laipui chuan president inthlak tur inbuatsaihna atana hman tur sum (federal funding) dollar maktaduai 7 a pechhuak nghal thin a. Mahse, he pawisa hi president atan thlan tlinte election fund lo neih sa atanga rulh leh a ni tlangpui  thin a. President-elect te hian  president inthlak dawn lai vela hman tur hi anmahni tantute hnen atangin sum an tuak leh fo a. Joe Biden pawh hian November thla tir khan dollar maktaduai sarih chu a tuak ngah tawh an ti a. Mahse, Biden hian amah tantute chu pawisa thawh belh turin a ngen leh hlawm a, engzat chiah nge a hmuh hriat a ni lo a. Heti hian sorkar sum maktaduai eng emaw zat chu humhimin a awm theih phah thin a, chin dan tha tak a ni awm e.