Tennis: The GOAT Race

Zirtirte khan Isua hnenah, ‘Tunge ropui ber?’ tih an zawt a. Mihringte hian tunge ropui ber tih hi kan zawhna zawh fo a ni. Mipa tennis inelnaah tunge ropui ber (Greatest of All Time -GoAT) tih pawh hi khawvelin kan inzawt mek a. Chu zawhna chhanna chu tun maiah a dikna a awm lo, mahse, a ngaihnawm hle thung...

Australian Open-ah vawi 8 champion tawh Novak Djokovic chu a champion nawn leh a. World number one ni lai a ni bawk a. Grand Slam lak tam kawnga Roger Federer leh Rafael Nadal-te a el mekna kawngah hma a sawn chho zel a. Anni pathum zingah hian tu ber hi nge Tennis GOAT chu tih hi mi tam tak titi a ni mek.

Greatest Of All Time (GOAT) teh nan hian eng hi nge pawimawh ber ti ila, inhnialna a chhuak nghal sa a. Mahse, Tennis-a ropui ber tehna atana hman tura langsar ber chu Grand Slam title hi a ni chang a. Djokovic hian Grand Slam title 18 a nei ve ta a. Rafael Nadal leh Roger Federer-te hi Grand Slam singles title la hnem ber niin, 20 ve ve an la tawh a. Kum khatah Grand Slam 4 a awm a, Djokovic hian heng mi ropui pahnih te hi a lehpel thei tih chu a chiang mai awm e. 

Djokovic hi kum 33 mi niin, Nadal hi kum 34 mi a ni a. Federer hi a upa hret a, kum 39 mi a ni a, ani hi chuan Grand Slam title a lak belh leh hi a rinawm tawh lem lo a. Australian Open kha khup na vangin a khel lo nghe nghe.

Mi thenkhat chuan GOAT chungchanga inhnialna hian player-te ropuina a tihniam mai mai niin an sawi a, a dik ve reng a. Anmahni theuhva an ropuina kha chu a ngai reng a, chung zinga ropui ber chu rilruin a zawng ve zel thung tihna a ni ve tho bawk a. A chhan pawh, Nadal hi French Open-ah tuma tluk rual loh a ni a, Federer pawh Wimbledon-ah a ropui a, Djokovic hi Australian Open-ah a sang filawr ve bawk.

Major title an tih, Grand Slam title lak tam lama inelna hi a zim tawh khawp mai a. Nadal leh Federer an inang tawh a, Djokovic pawhin pahnih chiahin a pha lo tawh bawk a. Kum 2009 khan Federer hian Grand Slam title 15-na lain, kum 27 mi niin Pete Sampras-a record a rawn lehpel a. Khatih lai khan mi tam tak chuan Federer hi lehpelh theih a nih an ring tawh lo a. Khatih lai khan kum 23 mi niin Nadal hian Grand Slam title 6 a la ve mek thung a, Djokovic phei chu 2008  Australian Open-ah a champion a, Grand Slam title pakhat chiah a la la a, an dinhmun a la inthlau veng veng hle a ni.

Federer hian kum 2003 leh 2010 inkar khan kum khatah Grand Slam title pakhat tal a la ziah a. 2011 atangin Djokovic hi a rawn invawrh ta thut a. Kum 2012 khan Federer hian Wimbledon title la leh mah se, a hnu kum 4 chhung chu Grand Slam title a la lo chho ta a. Nadal leh Djokovic an champion chho mawlh mawlh thung a. 2017 khan a elpuite inhliam leh khelh that tawk loh avangin Federer hi a rawn champion chho ve leh a, a elpuite aia title pathuma la hnemin a dinhmun a rawn siam tha leh a. Mahse, 2019 khan Nadal leh Djokovic hian Grand Slam 4-a pahnih ve ve lain, Federer hi a kawt ta thung a. Nikum khan French Open-ah Nadal hi champion lehin, Federer a nihrual ta a. Kuminah Djokovic chu Australian Open-ah champion ve lehin, Grand Slam title 18 a nei ve leh ta bawk a ni.

Grand Slam khelh tam lamah Federer hi a sang fal a, Djokovic-an dawtin, Nadal hian a khel tlem ber thung a. Federer hi Grand Slam-ah match 362 a chak a, match 59 a chak lo a. Djokovic hi match 303-ah chakin, match 45 a chak lo ve thung a. Nadal hian match 287 chakin, vawi 40 a chak lo ve bawk a ni.

Nadal hi French Open-ah vawi 13 champion tawhin, Grand Slam title 20 a neih zinga pasarih chiah Slam dang a ni a. Hemi avang hian mi tam tak chuan Federer leh Djokovic angin a all-round ve lo niin an sawi a. King of Clay Nadal anga Grand Slam pakhata champion hnem hi a hmei a pain an awm lo hrim hrim a. Chutih lai chuan Federer leh Djokovic pawh hian thiam bikna chu an nei ve tho a. Djokovic pawh hi Grand Slam title 18 a lak zinga pakua hi Australian Open title a ni a. Federer pawh Grand Slam title 20 a kawl zinga 8 lai hi Wimbledon a ni ve tho.

An pathum hian inanna an nei vek a. Open era-ah anni aia tennis star ropui hi awm lo mah se, an zavai hian Grand Slam zawng zawngah vawi hnih leh a aia tam champion vek an awm lo a. Djokovic hi French Open-ah vawi khat a champion thei chauh a, Federer pawh chuti tho chu a ni a. Nadal pawh hi Australian Open-ah vawi khat bak a champion thei rih bik lo.

Hetih lai hian Grand Slam-a an intumah Nadal hi a tha ber a. Grand Slam-a vawi 17 an intumah Djokovic hian Federer hi vawi 11 a hneh a.  Chutih lai chuan Nadal nen vawi 16 an intumah vawi 6 chiah a chak thung.

World number one nih rei lamah Federer hi a chungnung mek a, mahse, thla tharah hian Djokovic hian a lehpel tawh dawn a. Kar 311 chhung world number one a ni dawn a, Federer-an kar 310 chhung world number one ni-a record a siam chu a lehpel dawn a. Nadal hian kar 209 chhung chiah number one niin hun a la hmang thung a. Djokovic leh Federer-te mai bakah Pete Sampras (287), Ivan Lendl (270) leh Jimmy Connors (268) te pawh a la pha lo.

Djokovic hian number one nih rei zawnga hmahruaitu nih hi a tum a nih thu sawiin, “Ka ni dawn ta a, tunah chuan Grand Slam-a champion hnem ber nih ka tum leh dawn a ni,” a ti.

Title hrim hrim lak tam - tournament-a champion tam lamah Federer hi a chungnung ber mek a. Jimmy Connors (109) tih lohva title la hnem ber niin, Ivan Lendl hnuaiah Nadal leh Djokovic hi an la awm a. Chutih lai chuan Grand Slam hnuai chiaha ngaih ATP Tour Finals-ah Federer hi vaw 8 a champion tawh a, Djokovic hi vawi 5 champion-in, Nadal hi a la champion ve miah lo thung a. Masters 1000 Series-ah Dokovic hi vawi 36 champion-in, Nadal vawi 35, Federer vawi 27 a ni thung.