Tennis player-in silai a keng: ‘Russia sipai ka hmuh chuan ka tih tur ka hre chiang khawp mai!’

Sergiy Stakhovsky chuan tennis a khel thin a, khawvela a thiam pawl a ni thin. Tennis sawi tawha a hming sawi lan loh theih loh khawpa thiam Roger Federer pawh, a thiamna ber hmun - Wimbledon-ah ngei hneh ngat tawhtu kha a ni ve a. Tennis racquet ken dan zirtir a ngai lo ang. Mahse, silai erawh a ken dan, a kah dan leh hman dan zirtir a ngai ve maithei.

Stakhovsky hi kum 36-a upa a ni tawh a. Kumin Australian Open-ah khan khelh phak tumin qualifying round a khel a, mahse, a hlawhchham. Chumi hnu chuan tennis khelh a chawlhsan ta a. Kum 19 chhung zet tennis a khelh chhung hian khawvela a thiam pawl a ni tak tak a. Kum 2010 khan world number 31 te pawh a rawn ni hial a. Kum 2013 khan Federer chu Wimbledon-ah a hneh a ni.

Dubai khawpuiah chawlh hmanga a awm laiin a chhungte chuan phone hmangin an rawn bia a. Russia sipaiten Ukraine an run thu leh an khua, Ukraine ram khawpui Kyiv-a thil thlen dan an rawn hrilh a. An in bul maia thil puak ri dup dup an hriat thu an rawn sawi a. Stakhovsky chuan news enin a ngaithla nghal a. ‘BBC atanga thlalak ka hmuh te chu ka ring thei lo hial. Ka chhungte chu khawiah nge an awm, an him em, engtin nge ni dawn? tih chu ka ngaihtuahnaah a rawn lut nghal mawp mawp mai a ni,’ a ti.

Ni thum chhung chu mûmal pawh nei thei lovin, hrehawm takin a awm a, a mut pawh a mu thei lo.

Hma a la nghal thuai thuai a. A chhungte chu Hungary khawpui Budapest-ah, hmun himah a dah a. A thutlukna chu a nupui hnênah a hrilh a, a nupui chuan a remti lo nasa. Mahse, Stakhovsky chuan, ‘Kum 17 chhung zet Davis Cup (mipaten tennis hmanga ram leh ram inelna atana an khelh thin tournament) ka khel a. Chutih lai chuan kan rama thil thleng mek tlansan a, hmun hima ka awmna chhan tur ka hre lo a ni.

‘Ka chhuak ru a ni ber mai a. Ka fapa tê ber chuan min lo hmu a. Ipte nen ka inak hluai bawk si a, ‘Pa, khawnge i kal dawn?’ min ti a. ‘Ka lo haw leh vat ang,’ ka ti a, ka chhuahsan ta a ni,’ a ti.

Stakhovsky hian Ukraine a pan nghal mai lo va. Slovakia-a Bratislava khuaah kalin, a hmanraw mamawh tur te a la khawm a. Silai kah tlang zawh loh kawr (bulletproof vests) leh lukhum te lain, Ukraine ramri lam a pan a. Hetih lai hian Ukraine ram chhuahsan mek te pawh a hmu a. -8C temperature-a naupang za chuang intlar a hmuh thu leh hmuh hrehawm a tih thu a sawi.

A thiante nen an inhmu a, Ukraine ram khawthlang lama awm Lviv khawpui an pan a. He khuaah zan khat riakin, Kyiv khawpui a pan a, a chhungte a la thiar chhuah loh a unaupa leh a Pa te a va hmu leh phawt a. Chumi hnuah chuan an ram tana hna thawk tura tih a nihna hmunah a kal ta nghal a. Ni khat pawh sipai training chhim lo kha an ram chhan turin sipai thuamin a inthuam a, sipai tih thin te a ti chho ta nghal a ni.

Stakhovsky hi Kyiv khawpuiah dah a ni a, ‘Kalashnikov kan mutpui a, englai pawha che thei turin kan inring a ni,’ a ti a. Mahse, a hnathawh tam ber chu Russia sipaite lo kah ni lovin, mipuiten thu dik an hriat theih nana press mite kawm chu a ni ber zawk a. Russia-in an duh duh an sawi thin kara thu dik puanchhuah chu a hna thawh ber a ni ta zawk.

Tennis racquet hmanga ei zawng a ni a, a ban tha a chak em em. Mahse, silai chu a la ken ngai loh avangin inkahna hmunah awm ta se engtia chet lak tur nge tih a ngaihtuah nasa a ni awm e. Mipa a ni a, silai pawh a hria, han kah mai pawh a hreh lo ang. Mahse, indona tak tak hmachhawn dan chu a bangbo hle a ni. Tichuan, Kyiv bul mai Bucha khuaah a kal a, chulai hmun chu Russia sipaiten thla khat lai an lo luah tawh a ni a, an chet dan chu rapthlak tak a ni. Pawngsual, rawng taka inthahna hmun a ni a. TV leh internet lamah pawh kan hmuh kha. Stakhovsky chuan, ‘A takah chuan turu tak a ni, khawvelin a hmuh chin kha chu engmah a ni lo,’ a ti a. Chutiang khawpa indona nunrawng a hmuh hnu chuan silai nena a tih tur chu a chiang ta khawp mai a. ‘An thiltih kha mihring tiha mawi a ni lo a, Russia sipai huatnain ka khat lo thei lo a ni. Russia sipai ka hmuh phawt chuan inthiam lohna nei miah lovin ka tih nghal tur hi ka chiang em em a ni,’ a ti tawp mai.

‘Russia miten an ram sipai te chet dan hi an hmu vek a, chanchin thar lamah a lang chuai chuai reng a. Dik tak chuan mipuite hian an duh lohna an lantir ka beisei lutuk a ni. Mi tlem tein an duh lohna an lantir a, mipui an awm ngai lo, mi tlem te tak tak a ni. Chuvangin, a tirah chuan Russia-in kan ram a run avanga infiam mite hrem leh hrek hi ka duh lo hle a, mahse, heti taka an chet rawva tawh hnu pawha Russia miten demna thu an chhak chhuak lo hi ka dem a, na ka ti a. Wimbledon -ah Russia tennis player-te tel ve an phal lo te pawh hi ka thlawp ta viau a ni,’ a ti.

Stakhovsky hian Kyiv khawpui atangin Budapest chu vawi khat a va tlawh leh tawh a. Indona karah pawh Russia ram hnaih lo lam chu kal vel pawh a harsa vak lo a ni ang. 

Hetia Hungary rama awm a chhungte a va tlawh leh hian a fate hnenah pawh Ukraine rama a thiltih dik tak chu a hrilh ta niin a sawi a. Ukraine rama a kir leh hmain a nupui nen pawh an sawi dun nasa hle tih a sawi bawk.

‘Ka nupui hnenah pawh ka hrilh fiah a. Nasa takin kan sawi dun a. Tunah chuan ka thawl hawk tawh mai,’ tiin, Ukraine ramah, an ram chhan turin a kir leh ta a. ‘Tunah chuan rilru nuam leh zangkhai takin hun ka hmang thei tawh a ni. 

‘Ka nupui leh ka fa pathum te chu ka kalsan a, anni hi ka ngaiin ka thlahlel a.   An tan ka thawk a, anni leh ka ram chhanin ka awm ta a ni. Ka thiltihah hian thil ropui leh sawi hluai tur a awm hran  lo va. Mahse, ka thiltih hian awmzia te pawh a lo la nei ve thei hlauh maithei a ni,’ tiin, an ram chhana a chhuah thu Stakhovsky chuan a sawi a ni.